Mhada Lottery Mumbai : मुंबईत गेल्या दहा–पंधरा वर्षांत पुनर्विकासाची एक मोठी लाट उसळली आहे. जुन्या चाळी, दोन-तीन मजली इमारतींच्या जागी आज उंच उंच टॉवर झपाट्याने उभे राहत आहेत. एकेकाळी सर्वसामान्यांसाठी ‘स्वप्ननगरी’ असलेल्या मुंबईत रिअल इस्टेटचे (Real estate) दर इतके वाढले की घर खरेदी करणं अनेकांच्या आवाक्याबाहेर जाऊ लागलं आहे. पण या कठीण परिस्थितीतही MHADA ने सामान्यांना परवडणाऱ्या घरांची संधी सतत उपलब्ध करून दिली आणि हजारो कुटुंबांना स्वतःचं घर मिळवण्याचं स्वप्न साकार केलं. आता त्याच मार्गावर पुढे जात, म्हाडा मुंबईतील अत्यंत मोक्याच्या आणि प्रतिष्ठेच्या परिसरात एक भव्य गृहनिर्माण प्रकल्प उभारण्याच्या तयारीत आहे.
या प्रकल्पाची सर्वात मोठी खासियत म्हणजे तब्बल 85 मजली उंच टॉवर… आकाशाला स्पर्श करणाऱ्या या टॉवरचं काम सुरू करण्यासाठीची प्राथमिक तयारीही आता वेगात सुरू झाली असून, हे टॉवर्स पाहताना कोणाच्याही नजरा सहज वर जातील हे निश्चित.
प्रकल्प नेमका कुठे उभा राहणार?
वरळी BDD चाळी परिसरात आधीच पुनर्वसनाच्या इमारतींचं काम सुरू असताना, याच ठिकाणी म्हाडा आता विक्रीयोग्य घरांसाठी पाच भव्य टॉवर उभारण्याच्या तयारीत आहे. प्राथमिक आराखड्यानुसार, या प्रकल्पात दोन 58 मजली आणि तीन तब्बल 85 मजली गगनचुंबी इमारतींचा समावेश असेल. या टॉवर्ससाठी विमानतळ प्राधिकरणाकडून आवश्यक परवानगी मिळाली असून, पर्यावरण विभागाची अंतिम मंजुरी मिळताच प्रत्यक्ष कामाला हिरवा कंदील मिळणार आहे.
BDD चाळींच्या पुनर्विकासाचा मोठा आराखडा म्हाडा टप्प्याटप्प्याने राबवत आहे. वरळी, नायगाव आणि ना. म. जोशी मार्ग या तीन प्रमुख ठिकाणांतील redevelopment अंतर्गत, वरळीतील 121 चाळ्यांमधील 9689 रहिवाशांना पुनर्वसन करण्यासाठी 40 मजली 34 टॉवर उभारले जात आहेत.
पुनर्वसन पूर्ण झाल्यानंतर उरणाऱ्या मोठ्या भूखंडांवर म्हाडा विक्रीयोग्य घरांसाठी हे पाच उंच टॉवर उभारणार आहे. इथली सर्व घरे MHADA लॉटरीच्या माध्यमातून सामान्य नागरिकांसाठी उपलब्ध करून दिली जाणार आहेत.
वरळीत MHADA चे 5 मेगा टॉवर
वरळीत उभारण्यात येणाऱ्या या 5 विक्रीयोग्य टॉवरांचा आराखडा अत्यंत भव्य आहे. यापैकी दोन टॉवर 58 मजली असतील, ज्यामध्ये 1 बेसमेंट, 8 मजली पोडियम, एक ई-डेक आणि त्यावरील 48 मजल्यांवर प्रीमियम फ्लॅट्स तयार केले जाणार आहेत. या दोन्ही टॉवरांची उंची तब्बल 192 मीटर असेल.
तर उर्वरित तीन टॉवर आणखी भव्य — संपूर्ण 85 मजली उंचीचे! या टॉवर्समध्येही 1 बेसमेंट, 8 मजली पोडियम आणि वरच्या 76 मजल्यांवर आलिशान घरं असतील. हे टॉवर 300 मीटरपर्यंत उंच जाणार असल्याने, वरळीतल्या स्कायलाइनला बिल्कुल नवा आकार मिळणार आहे.
आगामी काळात MHADA कडून तब्बल 8 लाख घरांची उभारणी
मुंबई महानगर प्रदेशाला (MMR) नीती आयोगानं गृहनिर्माण क्षेत्राचा ‘ग्रोथ हब’ घोषित केल्यानंतर या भागात 2030 पर्यंत तब्बल 30 लाख परवडणारी घरे बांधण्याची मोठी योजना आखली गेली आहे. यापैकी 8 लाख घरं उभारण्याची जबाबदारी MHADA वर सोपवण्यात आली आहे.
ही प्रचंड मागणी पूर्ण करण्यासाठी म्हाडाकडून बांधकाम व्यावसायिक, डेव्हलपर्स आणि गुंतवणूकदारांना जोडण्यासाठी वेगवेगळ्या परिषदांची तयारी सुरू आहे—यात गुंतवणूक परिषद, पुनर्विकास परिषद यांचा समावेश आहे.
आता MHADA च्या 85 मजली टॉवरपासून ते पुढील 8 लाख घरांपर्यंतचा हा भव्य आराखडा कसा आकार घेतो आणि खरी घरं किती दर्जेदार बनतात, याकडे संपूर्ण राज्याची नजर लागलेली आहे.
FAQ
हा प्रकल्प नेमका कुठे उभारला जाणार आहे?
– हा भव्य टॉवर प्रकल्प वरळी BDD चाळ पुनर्विकास परिसरात उभारला जाणार आहे.
ही घरे कोण खरेदी करू शकतील?
– सर्वसामान्य नागरिकांसाठी ही घरे म्हाडाच्या लॉटरीद्वारे उपलब्ध होणार आहेत. म्हणजेच EWS, LIG आणि MIG गटांसाठी परवडणारी घरं मिळण्याची मोठी संधी!
BDD चाळीतील विद्यमान रहिवाशांची व्यवस्था कशी होणार?
– वरळीतील 121 चाळींमधील 9689 कुटुंबांचे पुनर्वसन स्वतंत्रपणे केले जाईल. त्यांच्यासाठी 40 मजली 34 टॉवर उभारले जात आहेत. पुनर्वसनानंतर उरलेल्या जागेवरच म्हाडा हे 5 विक्रीयोग्य गगनचुंबी टॉवर उभारणार आहे.
काळूबारे ता पनवेल जि रायगड