मुंबई : म्हाडाच्या मुंबई मंडळाच्या ‘प्रथम येणाऱ्यास प्रथम प्राधान्य’ योजनेत अंदाजे १५० घरांची विक्री जाहीर होणार असल्याने इच्छुकांचे लक्ष या जाहिरातीच्या तारखेकडे लागले आहे. मुंबई मंडळाने जाहिरातीची तयारी वेगात सुरू केली असून, लवकरच म्हाडाच्या ‘बुक माय होम’ या संकेतस्थळावरून घरांची थेट विक्री सुरू होण्याची शक्यता आहे.
१०% रक्कम अनिवार्य अन्यथा अर्ज रद्द
या योजनेत ४० लाखांपासून सुमारे ७ कोटी रुपयांपर्यंत किंमत असलेली घरे उपलब्ध होण्याची दाट शक्यता आहे. त्यामुळे इच्छुकांनी घराच्या एकूण किंमतीपैकी १० टक्के रक्कम आधीच तयार ठेवणे अत्यावश्यक ठरणार आहे. कारण, अनामत रक्कम भरून सर्वप्रथम अर्ज करणाऱ्याला पुढील ४८ तासांत ही १० टक्के रक्कम भरावीच लागणार आहे. ही रक्कम वेळेत जमा न झाल्यास त्याचा अर्ज तत्काळ बाद होईल आणि पुढील प्रतीक्षेत असलेल्या अर्जदाराला संधी दिली जाईल.
सूत्रांकडून मिळालेल्या माहितीनुसार, या घरांची थेट विक्री ‘बुक माय होम’ या ऑनलाइन पोर्टलवर होणार आहे. नोंदणी करण्यासाठी काही दिवसांचा कालावधी दिला जाणार आहे. अर्जदारांना आधारकार्ड, पॅनकार्ड तसेच जातवैधता प्रमाणपत्र यांसारखी कागदपत्रे ऑनलाइन जमा करून नोंदणी पूर्ण करावी लागेल. नोंदणी झाल्यानंतर अनामत रक्कमेसह अर्ज स्वीकारण्यास सुरुवात होईल. ज्या अर्जदाराने संबंधित घरासाठी सर्वप्रथम अनामत रक्कम भरून अर्ज सादर केला, त्याच्या नावावर ते घर आरक्षित केले जाईल.
येथे वाचा : मुंबईत म्हाडाचं चक्क 85 मजली टॉवर; ‘या’ परिसरात लॉटरीतून मिळणार घरं..!
यानंतर त्या अर्जदाराने पुढील ४८ तासांत घराच्या एकूण किंमतीपैकी १० टक्के रक्कम भरावी लागणार आहे. ही रक्कम वेळेत जमा न झाल्यास त्याचा दावा लगेच रद्द केला जाईल आणि पुढील पात्र अर्जदाराला संधी दिली जाईल. म्हणूनच इच्छुकांनी आगाऊ रक्कम तयार ठेवणे अत्यंत आवश्यक असल्याचे स्पष्ट होत आहे.
१०% भरल्यानंतर ९० दिवसांची मुदत; वाढीव कालावधीत व्याज लागू
अर्जदाराने सुरुवातीची १० टक्के रक्कम भरल्यानंतर, उर्वरित ९० टक्के रक्कम जमा करण्यासाठी त्याला ९० दिवसांचा वेळ दिला जाणार आहे. या कालावधीत संपूर्ण रक्कम भरता आली नाही, तर अर्जदाराला अजून ९० दिवसांची मुदत मिळू शकते; मात्र या अतिरिक्त कालावधीसाठी नियमानुसार व्याज आकारले जाणार असल्याची माहिती मुंबई मंडळातील सूत्रांकडून देण्यात आली आहे. दरम्यान, ‘प्रथम प्राधान्य’ योजनेतील बहुतेक घरे एक कोटी रुपयांपेक्षा अधिक किमतीची असल्याने, सुरुवातीची १० टक्के रक्कम तयार ठेवणे इच्छुकांसाठी अत्यंत महत्त्वाचे ठरणार आहे.
