Update Aadhaar from Home : आधारकार्डवरील माहिती अपडेट करण्यासाठी आता केंद्रावर जाण्याची गरज नाही. यूआयडीएआयने नव्या आधार ॲपमध्ये अशी सुविधा सुरू केली आहे, ज्यामुळे तुमचा नोंदणीकृत मोबाईल नंबर थेट घरी बसून बदलता येणार आहे. इतकंच नाही—लवकरच नाव, पत्ता आणि ई-मेल आयडी अपडेट करण्याचाही पर्याय उपलब्ध होणार आहे.
नव्या डिजिटल सेवेची सर्वात महत्त्वाची गोष्ट म्हणजे यासाठी कोणत्याही डॉक्युमेंटची आवश्यकता नाही. फक्त ॲपमधील ओटीपी व्हेरिफिकेशन आणि फेस ऑथेंटिकेशनद्वारे पूर्ण प्रक्रिया काही मिनिटांत पूर्ण होते. ग्रामीण भागातील नागरिक, ज्येष्ठ व्यक्ती आणि वारंवार स्थलांतर करणाऱ्यांसाठी ही सोय मोठा दिलासा ठरणार आहे. यूआयडीएआयने एक महिना पूर्वीच नवीन आधार ॲप लाँच केले असून, एका मोबाईलवर पाच लोकांचे आधार एकाच ठिकाणी व्यवस्थापित करण्याची सुविधा दिली आहे.
मोबाईल नंबर अपडेट कसा कराल?
1. ॲप उघडा आणि पिन टाकून लॉगिन करा
2. खाली स्क्रोल करून ‘My Aadhaar Update’ वर क्लिक करा
3. ‘Mobile Number Update’ हा पहिला पर्याय निवडा
4. सध्याचा नंबर टाका → ओटीपी व्हेरिफाय करा
5. नवीन नंबर टाका → ओटीपी व्हेरिफाय करा
6. फेस ऑथेंटिकेशनसाठी कॅमेऱ्याकडे पहा आणि क्षणभर डोळे मिटा
7. शेवटी ₹75 फी भरताच अपडेट प्रक्रिया पूर्ण
नवीन ॲपमध्ये कोणते फिचर्स?
(1) ई-आधार नेहमी मोबाईलमध्ये—झेरॉक्सची कधीही गरज नाही, (2) आयडी शेअर करताना फेस स्कॅन अनिवार्य, (3) ॲप पूर्णपणे बायोमेट्रिक प्रमाणीकरणासह, (4) इंग्रजीसह अनेक भाषांचा पर्याय, (5) इंटरनेट नसतानाही आधार पाहण्याची सुविधा
ही सेवा कशी काम करते?
ॲपमध्ये लॉगिन करण्यासाठी आधार क्रमांक टाका → ओटीपी व्हेरिफाय करा → ६ अंकी पिन सेट करा, आणि सगळ्या सेवांना प्रवेश मिळतो. पूर्ण प्रक्रिया कागदपत्राशिवाय, केंद्रावर न जाता, काही मिनिटांत पूर्ण होते.
मोबाईल नंबर अपडेट करणे का महत्त्वाचे?
आधार हा देशातील सर्वाधिक वापरला जाणारा ओळख पुरावा आहे. डिजिटल सेवा, बँक व्यवहार, सरकारी अनुदाने, आयकर पडताळणी—या सर्वांसाठी ओटीपी अनिवार्य असतो आणि तो तुमच्या नोंदणीकृत मोबाईलवरच येतो.
म्हणूनच नंबर हरवला, बंद झाला किंवा बदलला तर अनेक सेवा थांबतात. पूर्वी यासाठी केंद्रात जाऊन लांब रांगा लावाव्या लागत; आता तीच प्रक्रिया घरबसल्या, बायोमेट्रिक अडचणीशिवाय, अगदी सोप्या पद्धतीने करता येते.
